فيلم حلاوة روح

هو فيلم حلاوة روح أتمنع لية ؟


بدل إما أطلع و أأقولكم  إن الفيلم دة يستحق المنع من العرض أو إن دة تعدى على حرية الفن و الأفلام فى مصر ، ما تيجى نتكلم عن الموضوع بشكل أكثر تفصيلاً ، و أول حاجة لازم نفهمها هو الفيلم إتمنع إزاى .

وفقاً لموقع اليوم السابع  رئيس الوزراء إبراهيم محلب منع عرض فيلم حلاوة روح لحين عرضة على المصنفات الفنية  .

دلوقتى الكلام دة معناة إن فيلم حلاوة روح إتعرض على الرقابة و إتفرجوا علية و عادى جداً ووافقوا ، وبعد كدة تم عرضة لعدد من الأسابيع و بعد كدة رئيس الوزراء إبراهيم محلب منعة من العرض حتى عرضة على المصنفات الفنية مرة تانية .

طب هى إية المشكلة ، هى المشكلة إنة إتصرح بعرضة و لا المشكلة إنة إتمنع و لا المشكلة فى طريقة المنع ذات نفسها .

زمان أيام مبارك إتدخل علشان فيلم السفارة فى العمارة ( على حسب كلام عادل إمام ) ، و الكلام دة كان نفس النظام أيام السادات و عبد الناصر ، إية إلى يخلى الرؤساء يتدخلوا من الأساس فى عرض فيلم ؟ .

لو رئيس الوزراء إبراهيم محلب فعلاً عاوز يحارب الإسفاف فى الأفلام ، لية معقبش الرقابة إلى سمحتة من الأول ، لية مأمرش بتعديل قوانين الرقابة العايمة إلى تخلى أى فيلم يتقبل أو يترفض حسب أرائهم الشخصية ، لية متمنعش الفيلم من أول إسبوع ؟ .

دلوقتى فيلم حلاوة روح ممكن يرجع للمصنفات وتصرح بية تانى و بكدة إيرادات الفيلم هتبقى فى السما بعد البروبجاندا إلى إتعملت ، و ممكن الفيلم يكمل فى المنع من العرض و ساعتها تحميلاتة على الإنترنت هتبقى بردة فى السما .

أنا مش مع عرض الفيلم ؛ بس منع فيلم حلاوة روح مش هو الحل الكامل لمواجهة الإسفاف الفنى ، دة مجرد شو إعلامى يا محلب ! .