يعنى إية حب ؟

هو يعنى إية حب ؟؟؟؟؟؟؟؟؟؟؟؟؟؟؟؟؟

يعنى إية إنسانة تحبنى أو إن ربنا يحبنى وهل حب البشر زى حب الخالق ، طب خلونا نبتدى من نقطة ، الحب بينبع من كون الإنسان إجتماعى بغريزتة ولو ملاقش حد يكلمة هياخد كورة و يرسم عليها وش و يقعد يكلمها ( cast away J ) .

إية هية الحاجات إلى لما ألاقية ما بين إتنين أأقول إن الإتنين دول بيحبوا بعض ؟

أعتقد إن علشان أأقدر أأقول إنى بحب حد يبقى لازم فى إهتمام  و تضحية و تقبل و تفاهم .

الإهتمام

علشان يكون حد بيحب حد لازم يكون مهتم بية ، الإهتمام بيمثل المشاعر تجاه الأخرين ، والإهتمام فى بداية الحب بيبقى إسمة إعجاب لإنة غالباً بيبقى من طرف واحد .

التضحية

علشان إتنين يحبوا بعض لازم كل واحد فيهم يجى شوية على نفسة علشان ينجح العلاقة لإن مفيش إتنين شبة بعض تماماً و زى ما قولت قبل كدة مفيش حد بيغير التانى بشكل كبير ، فى النهاية التغير لازم يكون نابع من داخل الشخص علشان يعرف يطورة و يستمر معاة لفترة طويلة .

التقبل

وعلشان متحصلش مشاكل كتير ، الإتنين إلى بيحبوا بعض لازم يتقبلوا الإختلافات الفرعية فى حياتهم و أرائهم تجاة حاجات كتير ، ممكن الموضوع يبان إنة وحش فى الأول بس التقبل كويس على المدى الطويل طول ما الإختلافات دى لا تؤثر على النظام الدينى .

التفاهم

مينفعش أى حد فى علاقة حب مع طرف أخر يستبد برأية فى حاجات تافة و متأثرش على مجمل العلاقة ، التفاهم هو إنك تقعد مع الإنسان إلى بتحبة و تفهم وجة نظرة فى الموضوع و تهز راسك لحد ما يخلص و تستوعب كلامة كويس و بعد كدة تبدأ تعرض وجة نظرك إنت كمان و توصلوا لحل يرضى جميع الأطراف فى النهاية ، مش لازم يكون حلك أو حل ممكن تخترعوا حل جديد J .

ربنا مش محتاج يضحى علشانا علشان ربنا كامل ، ربنا متفاهم معانا و عارف نقصنا و متقبل النقص دة علشان كدة ما بيطلبش مننا حاجات فوق طاقتنا ، الفروض حب لإنها تضحية J .

تابِع @abotgar